Komin heim

Já ég veit það ekki Helga mín, andleysi eftir langt frí eða sólin og blíðan í Lystrup sem heldur mér úti í garði :-)
En við erum allavega komin heim eftir dásamlega Spánarferð í ennþá dásamlegri félagsskap! Hvítvínsflöskurnar hlupu á tugum og brúsarnir af sólarvörn kláruðust hver af öðrum. Enda held ég að börnin mín hafi komið hvítari heim! Gummi fékk víst að heyra það í síðasta Hekluleik og menn héldu að hann hafi verið að ljúga með þetta Spánardæmi alltsaman! Okkur fannst bara skugginn bestur, enda bjórinn fljótur að verða flatur í sólinni. Svo veit það nú heldur ekki á gott að grilla litlu kroppana sem rassaköstuðust mismikið í ferðinni (nefni engin nöfn hehe).

Mikil ósköp var nú samt gott að koma heim aftur! Nói skreið hérna um allt með sælubros á vör og var svo himinlifandi með dótakassann sinn. Eins og hann hafi verið að eignast fullt af nýju dóti. Ylfa var nú hálf vængbrotin fyrstu dagana, búin að hafa Fönn sína frá morgni til kvölds og Helena farin í sumarfrí heim til Færeyja. Alveg agalegt, og kemur svo ekki heim fyrr en í ágúst byrjun. Það verða heldur betur fagnaðarlæti hér á heimilinu þá, ekki síður hjá okkur foreldrunum! En Ylfa var nú samt ekki lengi að koma sér í leik með krökkunum í götunni og það er búinn að vera mömmó með öll Build a bear börnin síðustu daga. Svo fór þessi elska í stresskasti í leikskólann í morgun, aftur nýbyrjuð og erfitt að hafa sig af stað. En hún var eitt sólskinsbros þegar ég sótti hana komin á fullt í leik með nýjum vinkonum. Hetja, ekki satt!

Við erum sem sagt í góðum gír í B4 og komin á bólakaf í mold og hellur í garðinum! Jarðaberin að spretta fram og kryddjurtirnar allar að koma til. Já maður er myndarlegur með køkkenhave undir stofuglugganum híhí